Mga ginapatuman nga istrikto nga protocols sa Iloilo province, padayunon samtang wala pa makadesisyon kun i-apelar ang pagpaidalum sa probinsya sa MECQ sa Hunyo 16-30 — Prov’l Administrator Atty. Suzette Mamon
ILOILO – Padayon ang pagpatuman sang Provincial Government sang mga istrikto nga protocols pareho sang border control points, travel pass para sa essential travels, reverse isolation kag liquor ban.
Magatakup kuntani ang executive order ni Gov. Arthur Defensor, Jr. nga nagapatuman sang amo nga mga mandu sa Hunyo 18.
Pero gin-anunsyar kagab-i, Hunyo 14, ni Presidente Rodrigo Duterte nga ipa-idalum ang probinsya sa modified enhanced community quarantine (MECQ) upod sa Iloilo City halin Hunyo 16 tubtob 30, 2021.
Suno kay Provincial Administrator Atty. Suzette Mamon, antes pa ang announcement ni Presidente Duterte, naplastar na sa mga issuances ni Gov. Defensor ang mga patakaran nga kapareho na sang ginahimo sa MECQ level.
Indi pa makahambal si Mamon kun i-apelar sang probinsya ang bag-o nga classification bangud may basehan man ang Inter-Agency Task Force sa amo nga desisyon.
Halin man suno kay Mamon sa probinsya ang data nga ginbasehan sang IATF sa paghimo sang desisyon.
“We have to comply with the directive because the IATF has also the basis of saying so,” suno kay Mamon.
Nagahimo man suno kay Mamon sang assessment ang probinsya sa adlaw-adlaw nga mga kaso sang COVID-19 nga amo ang mangin basehan sa himuon nga tikang. –via Aksyon Hotline