Capiz, Negros Occidental, nakabaton sang Pfizer/BioNTech COVID-19 vaccine

WESTERN VISAYAS – Masobra isa ka libo ka taga-Capiz ang mabakunahan sang Pfizer/BioNTech COVID-19 vaccine.

Nabaton kahapon, Hunyo 17, sang Capiz Provincial Government ang ila alokasyon nga 2,340 doses sang amo nga bakuna nga para na sa first kag second dose.

Sang Mayo, nagbakal ang Capiz Provincial Government sang duha ka ultra-low temperature freezers agud ma-akomodar ang Pfizer vaccine nga kinahanglan taguon sa temperatura nga -80 degree Celsius tubtob -60 degree Celsius.

Magluwas sa Capiz, nakabaton man ang Negros Occidental sang 11,700 doses sang Pfizer/BioNTech vaccines kahapon sang aga.

Base sa Strategic Advisory Group of Experts on Immunization sang World Health Organization, 95% nga epektibo ang Pfizer vaccine batuk sa symptomatic SARS-CoV-2 infection. Ginatublok ini sa 21 ka adlaw nga interval.

Sa Western Visayas, Negros Occidental kag Capiz pa lang ang nakabaton sang Pfizer vaccine.

Ang masobra 2.3 million doses sang Pfizer vaccine nga nabaton sang Pilipinas ang gindonar sang global initiative nga COVAX Facility nga ginapamunuan sang WHO.

Sa Pilipinas, ang bakuna sang Pfizer ang ginatublok sa priority groups A1 tubtob A3 ukon mga health workers, senior citizens kag persons with comorbidites, kag maka-access man ang indigent sector ukon ang mga yara sa priority group A5.

Paathag ni vaccine czar Sec. Carlito Galvez, Jr., sa pagdesisyon sang alokasyon, ginsunod sang Department of Health ang mandate sang COVAX nga dapat maka-avail sa ila ginadonar nga mga bakuna ang vulnerable sectors. –via PIA/OCD 6