Gaisano Grand Mall sa San Jose de Buenavista, Antique, nasunog; sunog, naglab-ut sa general alarm
ANTIQUE – Naglab-ut sa general alarm ang sunog sa Gaisano Grand Mall sa San Jose de Buenavista, Antique kahapon, Hunyo 17.
Paathag ni Bureau of Fire Protection (BFP) 6 Director Fire Senior Supt. Jerry Candido, nagakahulugan ini nga dapat respondehan sang tanan nga firefighting units sa Antique ang sunog. Nagresponde man ang firetrucks sang San Joaquin, Miag-ao kag Guimbal sa Iloilo, Nabas BFP sa Aklan kag super tanker sang BFP- Iloilo City.
Sa initial nga imbestigasyon, nagsugod ang kalayo sa second floor sang mall antes madasig nga naglapta. Nagpabudlay man sa mga bombero ang superheated nga hangin halin sa nagadaba-daba nga kalayo.
Natinguhaan naman sang mga bombero nga mapangapinan ang ground floor sang mall paagi sa pagbasa sang tubig sa palibot sini agud indi na maglaton ang kalayo. Wala naman naglapta ang kalayo sa compound sang mall nga may katupad nga mga boarding houses.
Yara sa first floor nahamtang ang mga restaurants kag grocery store.
Wala sang may napilasan ukon casualty sa sunog.
Mga pasado las-singko sang hapon nagsugod ang kalayo kag naghagan-hagan mga lasotso sang gab-i. Pero liwat nag-ibwal ang kalayo pasado las-nueve sang gab-i antes gindeklarar nga under control pasado las-12 sang tungan gab-i.
Madamo ang naapektuhan sa sunog, suno kay San Jose Mayor Elmer Untaran. Ginabanta niya nga 100 ka mga empleyado ang apektado bangud sa second floor gid ang ila trabaho nga naupos gid sa sunog.
Magluwas sa mga empleyado, nanugunan man ang alkalde bangud madulaan sang negosyo ang mga nagapanag-iya sang mga boarding houses sa palibot sini sa diin nagatiner ang mga empleyado sang mall.
Mangayo sang assistance ang alkalde kay Congresswoman Loren Legarda. Ginahingyo niya man ang mall management nga pangitaan sang paagi agud masaylo sa iban nga branch ang mga displaced workers. – via ARI news team