ANTIQUE — Makabaton sang tag-P5,000 nga cash kag tag-25 kilos nga bugas ang ginabanta 400 ka mga empleyado sang Gaisano Grand Mall sa San Jose, Antique nga na-apektuhan sang sunog kahapon.

Suno kay Antique Governor Rhodora Cadiao, ginmanduan niya ang sa ila Finance Committee nga i-release ang 2-million pesos nga pondo para sa assistance sang mga apektado agud nga mapanagtag subong nga hapon.

Kalabanan suno sa iya sa mga nagatrabaho sa mall ang mga taga-Antique.

May yara man sang mga taga-Aklan kag taga-Iloilo pero tanan sila ang makabaton gihapon sang bulig halin sa provincial government.

Una na nga nagpasalig ang gobernadora nga buligan ang mga na-apektuhan sang sunog.

Gintawgan man sang Antique provincial government ang tag-iya sang mall agud pamangkuton kun ano ang ila plano sa mga empleyado nga wala na sang trabaho.Naga-coordinate man si Cadiao sa Department of Labor and Employment kag sa TESDA para sa posible pag-conduct sang Job Fair para mabuligan ang mga nadulaan sang obra.

‘UNSAFE ANG BUILDING’

Gindeklarar naman sang mga taga-Bureau of Fire Protection-Antique nga unsafe na ang mall bangud sang posibilidad nga may mag-ibwal nga kalayo kag indi na estable ang structure sang building.

Dako man suno sa iya ang kahalitan sa establisyemento pero indi pa ini ma-estimate sang BFP suno kay Cadiao.

Naghalin ang kalayo sa ikaduha nga panalgan sang mall sa diin may mga balaligyaan sang panapton.

‘ARSON?’

Indi naman magpati si Governor Cadiao sa naguwa nga anggulo nga arson ang sunog sa mall.

Mas maayo suno sa iya nga hulaton ang resulta sang imbestigasyon sang BFP antes magpati sa amo nga impormasyon.

Ginpahayag niya nga naga-recover na ang mall halin sa halit sang COVID-19 pandemic bangud amat-amat na nga nagadamo ang nagapamakal antes pa natabo ang sunog. — via BBB

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply