ILOILO — 13 ang mga nagpositibo sa COVID-19 sa Concepcion matapos nagtambong sa despedida party sang OFW sa Brgy. Batiti, sang nagligad nga semana.

Ini ang ginkumpirmar ni Concepcion Mayor Raul Banias base sa iya Facebook post.

Suno sa alkalde, nagpa-swab sang Hunyo 14 ang 50-anyos nga OFW kag nagguwa ang resulta sang Hunyo 15 nga positibo siya sa COVID-19.

Antes gin-release ang iya RT-PCR test result, ginpahayag ni Banias nga ginlapas sang OFW ang COVID protocol sang nagkadto siya sa airport para kuntani sa iya flight pabalik sa Manila para sa iya deployment sa Middle East.

Indi siya makabiyahe kun wala siya sang negative RT-PCR test result.Natukiban sang alkalde nga ginlapas pa gid sang babaye ang protocol sang naghiwat siya sang despedida party sang Hunyo 13 sa iya balay kag gin-imbita ang iya mga abyan kag himata.

Dugang pa sa FB post ni Banias, nag-imbestigar ang mga contact tracers sang banwa sang Hunyo 15 kag base sa initial report, ginabanta sa 36 ka tawo ang nagtambong sa party kag kalabanan mga himata sang OFW halin sa Sitio Hurog, Jamul-awon.

Gilayon nga gin-quarantine ang babaye kay iya pamilya sa isolation facility sang banwa.

Sang Hunyo 16, gin-swab ang 54 ka tawo para sa RT-PCR tests kag sang Hunyo 17, nagguwa ang resulta sa diin 13 gid ang nagpositibo suno kay Banias.

Gilayon nga gin-lockdown ang Sitio Hurog, Brgy. Jamul-awon.

Ginpahayag sang alkalde nga wala pa ginsugid sang 50-anyos nga OFW ang tanan nga impormasyon kun sin-o ang iya mga close contacts.

Pero ginpilit siya sang mga contact tracers nga magpanugid kag nagkuha man sang dugang nga impormasyon sa iban nga sources sa diin na-identify ang mas madamo pa niya nga close contacts.

Ang iban nga close contacts ang naghalin sa Brgy. Niño kag Tamis-ac, subong man sa Batiti.Base sa pending test results sang mga gin-swab nga gin-release sang Hunyo 17 kag 18, 29 ang nagnegatibo sa COVID-19 suno kay Banias.

As of June 20, 17 na ang positive COVID-19 cases sa Concepcion, Iloilo suno kay Mayor Banias, lakip na ang 13 nga nagtambong sa despedida party.

Sa amo nga numero, 16 diri ang naka-quarantine kag isa ang na-ospital bangud nakitaan sang sintomas sang balatian.

SHOW CAUSE ORDER PARA KAY KAPITAN SANG BRGY. BATITI

Sang Hunyo 18, nag-issue sang show cause order si Banias sa kapitan sang Barangay Batiti bangud sang ginhiwat nga despedida party.

Posible suno sa alkalde nga mapasakaan sang kaso ang kapitan ukon ma-suspend ukon mapahalin sa pwesto kun indi makapaathag sang maayo sa natabo.

“Ti wala ako mahimo nag issue na ako sang June 18 sang Show Cause Order kay Kap Melvin sang Batiti kay nag pa party kamo iya. Kon indi ini masabat ni Kap Melvin convincingly in 2 days pasakaan sya panumbungon sang DILG kag posible ma suspend or mapahalin sya sa pwesto,” ang post ni Mayor Banias. — via Concepcion, Iloilo Mayor Raul Banias Facebook post, June 20, 2021

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply