ILOILO CITY –Ginapanindugan ni Iloilo City Mayor Jerry Treñas nga ginbasehan nila ang guidelines sang Department of Trade and Industry (DTI) sa pagpahanugot sa pag-operate sang mga beauty parlors, barber shops, kag dine-in sa mga restaurants samtang napaidalom sa Modified Enhanced Community Quarantine (MECQ) ang siyudad.

Sa una nga interview sang Aksyon Radyo Iloilo kay DILG 6 Legal Officer Atty. Cedric Jaranilla, ginpahayag niya nga sa Omnibus Guidelines nga gin-amendar sang Mayo 20, 2021, ginadumilian ang dine-in services kag operasyon sang personal care service pareho sang beauty salon, beauty parlor kag medical aesthetic clinic sa lugar nga napaidalum sa MECQ.

Suno kay Treñas, “Ang ini ‘ya sa aton sa mga barber shops kag salons, ginasunod ta ni ‘ya ang DTI nga guidelines. I think may diutay nga inconsistency ang duha – ang Omnibus guidelines kag ang DTI guidelines. Ginpanigurado ta lang nga mas makahatag kita [sang] ligwa kay ti nalouy na kita sa mga barber shops kag mga salons nga naga-ulubra dira – ang mga barbero ta, mga beauticians, anyway allowed man sa DTI nga guidelines.”

Ginpahayag ni Treñas, “Well, we will wait for DTI to tell us nga ipasira para nga waay pa gid [sang] ubra ang iban.” “Kita ya MECQ, amo na nga nagapangita man ‘ta ligwa nga matulutugtan ta man ang mga restaurants – dine in nga 10%, alfresco –30%, kag mga barber shop, kag mga salon. Kun gusto sang DILG kag DTI nga ipasira, pwede nila mapasira para nga pangitaan man nila dayon bulig ang mga madulaan pa gid sang ubra. Kay ang daw nagakatabo bala, kita man lang di ang nagapangita sang paagi para makabulig kita sa mga nawad-an sang trabaho. So ang akon lang ihambal, kun gusto nila ipasira, ipasira nila kag panghatagan nila sang kwarta para ang ini nga mga tawo nga nadulaan sang ubra, may ara man ibakal nga ikaon nila,” dugang pa sang alkalde.

Pero ginpaathag sang DILG nga pwede maka-apelar ang LGU sa National IATF sa pag-relax sang protocols kag ipaagi sa Regional IATF.

Nagapati man ang alkalde nga nakabulig gid ang MECQ status agud mapunggan pa gid ang pagdamo sang kaso sang COVID-19 sa siyudad. Pero madamo na suno sa iya ang apektado, “Pero ti ang akon mahambal, madamo na ang apektado kag nagalalain na sila. Indi man kita kahatag [sang] ayuda parehas sa Metro Manila nga ginhatagan nila tag-P1,000 ang tanan. Waay man nagsulod diri ang IATF kag maghambal nga ‘manghatag kami [sang] tag-P1,000 sa inyo.’ Kita diri nabilin para ibalansehon ang ini nga mga bagay – ang health kag aton nga ekonomiya. Kag ako ya ti kun gusto gid sang DILG nga ipasira, ipasira nila ang tanan nga restaurants. Pero amo ni ang ibilin ko sa ila, hatagan nila ayuda ang tanan nga mawad-an sang trabaho. Gina-amat-amat na naton gani balanse ang ekonomiya sa aton nga health…pero ti kun mas gusto nila ipasira, ipasira nila.” –via Firingline, June 19, 2021

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply