Iloilo City Mayor Jerry Treñas, nagpangayo sa DOH 6 sang listahan sang mga nabakunahan sang masobra 17,000 doses sang COVID-19 vaccine

ILOILO CITY – Nagpangayo si Mayor Jerry Treñas sang listahan sang mga ginhatagan sang masobra 17,000 doses sang COVID-19 vaccines nga iya una ginreklamo kay DOH Secretary Francisco Duque nga wala man nagkadto sa City Government.

Ini bisan nga naghatag na sang sabat ang DOH 6 sa iya sulat kun diin nagkadto ang amo nga mga bakuna. Suno sa DOH 6, gindiretso nila sa mga ospital sa syudad sang Iloilo ang ginatumod nga mga bakuna.

Suno sa alkalde, dapat mangin transparent ang DOH kag ipakita kun sin-o ang nakabenepisyo sang amo nga mga bakuna.

Ginhangkat man ni Mayor Treñas si Health Undersecretary Maria Rosario Vergeire nga ipa-account ang masobra 17,000 doses sang mga bakuna agud mahibaluan kun diin gindala sang DOH Region 6. –via Jeremae Ventar