ILOILO CITY – “Nagtumbo man ang aton tagipusuon sa kalipay kay nakita man naton nga na-appreciate kita sang aton nga amay sang kapulisan especially sa Chief PNP naton.”

Ini ang reaksyon ni Police Executive Master Sergeant Ceasar Pinuela sang Jaro Police Station matapos nga gindayaw siya ni PNP Chief Guillermo Eleazar bangud sa iya pagpanguna sa bible study sa mga detainees kag pag-conduct sang community pantries.

Suno kay Pinuela, 2014 pa sang ginsuguran sa Jaro Police Station ang bible study sa ila mga detainees, “para at least indi man sila bala mag-lose hope. At least indi sila magpaminsar kun ano pa dira kun kita mismo naga-share kita sang word of God para at least mahugmay man sa ila tagipusuon. Kay ti sa sulod [sang presuhan] daan kabudlay…kinahanglan tagaan ta gid sila sang moral values, guide on individuals on how to evaluate –right versus wrong.”

Gin-ako niya nga ginahimo na niya ang pag-conduct sang bible study sa mga detainees sa pila ka police stations sa Negros Occidental kag probinsiya sang Iloilo antes siya gin-assign sa Iloilo City.

COMMUNITY PANTRY

“Manggaranon kita sa aton kapisan. Kun mapisan ka sa pagpananom-tanom.”

Ang iya mga gintanom ang ginaluto niya kag ginagamit sa community pantry.

Ginpahayag ni Pinuela nga kada adlaw nagapreparar siya sang pamahaw “Every day nagahimo ako sang pamahaw, nagaluto ako na – pinakanubo ko lang nga luto bisan miswa na lang bi laktan naton sang balunggay, laktan naton sang kalubay. Daku na ina nga bulig sa aton mga pumuluyo nga pamahaw kun aga.”Ginaluto niya ang pagkaon sa iya opisina sa Jaro Police Station kag ikarga sa police car, “Ginaluto ko ina sa akon opisina nuh– ako nagaluto, ako nagahimos tapos ibutang ko ini sa patrol tapos ilibot ko ini. Ginatan-aw ko kun diin ang area nga daw medyo pulupigado kag ihatag ko sa ila. Indi lang isa ka barangay [sa Jaro] kundi libuton ko ini tanan.”

May mga sponsors man si Pinuela sa community pantry kag may nagabulig man nga iban nga grupo.

Si Pinuela ang present gid sa tanan nga community pantry sang Aksyon Radyo Iloilo sa Jaro kag nagadala sang iya produkto halin sa mga pananom niya kag ginapanghatag sa mga pumuluyo. –via Firingline

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply