Former Iloilo City Vice Mayor Guillermo dela Llana, napatay sa edad nga 93 kag nagpositibo sa COVID-19

Read Time:1 Minute, 25 Second

ILOILO CITY — Napatay si Former Iloilo City Vice Mayor Guillermo De la Llana sa edad nga 93.

Ginkumpirmar ini sang iya apo na si Nene De la Llana. Suno kay Nene, las-7 kagab-i, napatay sa Iloilo St. Paul’s Hospital ang anay bise alkalde.

Ginkumpirmar man ni Nene nga positibo sa COVID-19 ang anay opisyal sang napatay.

Gindala sa ospital si former Vice Mayor De la Llana sang nanotisyahan sang ila pamilya nga daw naglain ang iya kahimtangan.

Dugang pa ni Nene nga wala man sang iban nga ginbatyag ang iya nga lolo, pila ka adlaw antes siya nila gindala sa ospital.

Nagpasalamat si Nene sa suporta sang mga Ilonggos sa iya nga lolo kag ginakalipay gid sang ila pamilya nga wala sila sang nabatian nga malain batok sa bise alkalde bisan sang yara pa siya sa serbisyo.

Sa Facebook post naman ni Iloilo City Mayor Jerry Treñas, ginpalab-ot niya ang iya kalisod sa pamilya De la Llana.

Nagpasalamat man siya sa nangin serbisyo sang anay opisyal kag ginpabutyag nga madamo ang iya napangbuligan sang yara pa siya sa serbisyo.

Si former Vice Mayor De La Llana ang una nagserbisyo bilang konsehal sang siyudad sang 1988 kag nangin bise-alkalde sang 1998.

2001 sang nagpapili siya sa pagka-mayor apang napierde ni Iloilo City Mayor Jerry Treñas.

Liwat siya nga nagpapili bilang vice mayor sang 2004 kag liwat man nga nagdaug.

Si De la Llana ang nagserbe man nga Executive Assistant for the Mentally Ill sang tiun ni former Mayor Jed Patrick Mabilog kag nangin private secretary sang tiun naman ni former Joe Espinosa III. — via Firing Line/Interview with Nene De la Llana | photos from Cha De la Llana