Travel pass, dulaon na sa Iloilo province

ILOILO – Magapatuman sang pila ka adjustments si Iloilo Governor Arthur Defensor, Jr. sa mga gina-implementar nga restrictions sa probinsya sang Iloilo.

Suno sa iya, dulaon na ang border control checkpoints sa mga banwa kag indi na pag-i-require ang travel pass sa Hulyo 1 tubtob 15, 2021.

Dumilian naman ang dine-in policy sa mga restaurants base sa rekomendasyon sang DILG, samtang siraduhan gihapon ang mga beach resorts sa probinsya.

Idumili man ang pagbukas sang mga non-essential establishments kag mass gatherings.

Samtang, indi mag-apelar si Defensor sa National Inter-Agency Task Force para sa mas halog nga quarantine status sa probinsiya.

Suno kay Defensor, batunon niya ang rekomendasyon sang DOH.

Ang manami lang suno sa gobernador nga bisan madamo ang kaso sang COVID-19 sa probinsiya kada adlaw, na-flatten ang curve kag wala na nagataas sa sulod sang masobra duha ka semana.

Dugang sang gobernador, kun basehan ang daily average attack rate sang probinsiya nabutang ini sa below 7 rason dapat kontani ang quarantine classification sang probinsiya manubo sa modified general community quarantine kun basehan ang yard stick nga ginagamit sang DOH.

Maga-issue sang executive order ang gobernador bwas, Hunyo 30 para sa iban pa nga adjustments sa restrictions.

Extended tubtob Hulyo 15 ang MECQ sa probinsya sang Iloilo base sa rekomendasyon sang Inter Agency Task Force nga gin-aprubahan ni Presidente Rodrigo Duterte. –via Balita Halin sa Kapitolyo