Granada kag pusil, na-recover sa drug buy bust operation sa Molo; Kaupod sang subject, patay sang natiruhan matapos ginpahayag nagbato sa pulis

ILOILO CITY — Na-recover ang M26 hand grenade kag .38 caliber nga pusil sa ginhimo nga drug buy bust operation sa Brgy. North Baluarte, Molo pasado las-10 kagab-i nga gin-conduct sang City Proper Police Station Drug Enforcement Team.

Ginkilala ang subject kay Dave Mendoza, 23-anyos sang Rizal Pala-pala 2, City Proper nga nakuhaan sang tatlo ka sachets sang suspected shabu kag P2,000 nga buy bust money.

Natiruhan naman ang kaupod niya sang ginpahayag nagbato sa mga operatiba nga ginkilala kay Karl Daniel Bolante, 27-anyos sang North Baluarte, Molo.

Dead-on-arrival sa ospital si Bolante bangud sang igo sa dughan. Ginkumpirmar ini sang iya nga iloy.

Suno sa mga residente sa lugar, apat ka lupok sang pusil ang ila nga nabatian. Suno naman kay Capt. Shella Mae Sangrines, hepe sang City Proper Police Station, indi niya pa matumod kun sin-o gid ang una nga nagpalupok sang pusil.

Pagkatapos sang insidente, may nakit-an nga granada sa idalum sang balay kun diin natiruhan si Bolante kabangdanan nga gintawgan sang mga taga-Explosive Ordnance Disposal team.

Wala naman naghatag sang pahayag si Mendoza sang gin-interview sang Aksyon Radyo news team.