Pamilya sang food delivery rider nga napatay sang nabungguan sang pribado nga salakyan sa Gen. Luna flyover, kulang ang kwarta nga inugbayad sa ospital agud ma-release ang bangkay
ILOILO CITY — Wala pa makuha sa hospital ang bangkay sang food delivery rider nga nabungguan sang Toyota Fortuner sa intersection sang Gen. Luna-Jalandoni Flyover sang Hulyo 1 sang gab-i.
Ginkilala ang napatay kay Zsisley Cesnero, 34-anyos sang Molo.Nagsindi sang kandila kag naghalad sang pangamuyo sa natabuan sang aksidente ang kaupdanan nga riders ni Cesnero.
Suno kay Jaime Richard, kaupod ni Cesnero, masobra P12,000 ang balayaran sa hospital. Dugang pa niya, pigado gid ang pamilya ni Cesnero gani naatrasar ang pagkuha sang bangkay.
Naghimo man sang fundraising ang mga riders agud makatipon sila sang kwarta nga ihatag sa pamilya. Tatlo ka tuig ang edad kag apat ka bulan nga lapsag ang kabataan ni Cesnero.
Nag-apelar ang pamilya sa luyag magbulig sa ila nga mahimo mag-contact sa numero sang iya asawa nga 0915-3895-497. Ginkilala ang driver sang Toyota Fortuner kay Keith Estellero, 35-anyos.
Suno kay Police Lieutenant Colonel Marlon Valencia, head sang Traffic Investigation Enforcement Unit, pakadto sa Atrium ang direksyon sang Toyota Fortuner kag motorsiklo.
Nabungguan sang Toyota Fortuner ang motorsiklo nga ginasundan pag-abot sa intersection sang Gen.Luna-Jalandoni flyover.
Gilayon nga ginpaandar ni Estellero ang iya salakyan sa pagpalagyo, pero madasig nga ginlagas sang iban nga riders.Sa area sa Baluarte na naabtan sang mga riders kag mga pulis ang driver sang salakyan.
Gin-release naman ang driver sang salakyan matapos nagpiyansa.
