Driver sang Fortuner nga nakabunggo-patay sa Grab delivery rider sa City Proper, ipatawag sang LTO 6
ILOIO CITY — Ipatawag sang Land Transportation Office 6 ang driver sang Fortuner nga nakabunggo sa Grab delivery rider sa City Proper sang Hulyo 1.
Suno kay Atty. Allan Sacramento and chief sang Operations Division sang LTO6, ginpa-coordinate na niya ang ila enforcer sa City Proper police agud magpangayo sang incident report sa natabo.
Ginapreparar na suno sa iya ang show cause order batok sa driver sang Fortuner agud nga ma-imbitar siya sa LTO6.
Ginpaathag ni Sacramento nga pwede mapreso sang tubtob tatlo ka bulan, magmulta sang P30,000 tubtob P80,0000, kag ma-revoke ang driver’s license kag indi na liwat makakuha pa sang lisensiya ang driver sang salakyan nga ma-involve sa aksidente kun mapamatud-an nga yara siya sa impluwensiya sang makahulubog nga ilimnon ukon illegal drugs.
Nabutang sa section 7 sang Republic Act 10586 ukon ang Anti-Drunk and Drugged Driving Act of 2013 nga dapat, gilayon nga i-test ang driver sang salakyan kun may mapatay ukon mapilasan sa aksidente nga iya ginadalahigan.
Kun wala sang breath analyzer machine, mahimo nga mapa-laboratory test ang driver agud mahibaluan kun may presensiya ang makahulubog nga ilimnon ukon illegal nga druga sa iya lawas, dugang pa ni Sacramento.
Matandaan nga ginamaneho ni Keith Estellero ang Fortuner nga nakabunggo-patay sa Grabe rider nga si Zsisley Cesnero sa Gen. Luna – Jalandoni flyover. Wala na-test si Estellero paagi sa breath analyzer machine pero gin-ako niya nga naka-inom siya sang natabo ang aksidente. — via Aksyon Night Patrol
