ILOILO — Umpisahan na sang Iloilo Police Provincial Office (IPPO) ang pagpatuman sang border control sa boundary sang San Joaquin kag Antique subong nga adlaw, Hulyo 20. Kasunod ini sang pag-anunsyar ni Iloilo Gov. Arthur Defensor Jr., nga mapatuman man ang probinsiya sang border control sa mga boundaries sang Iloilo Province.

Suno kay IPPO Dir. Col. Gilbert Gorero, pasugtan pa nila subong nga makalabay sa border ang luyag magpauli sa probinsiya.

Kinahanglan lang nila nga magpakita sang ID. Pero umpisa sa Hulyo 21, kinahanglan na nila sang certification ukon letter of acceptance sa lugar nga ila puli-an bilang proof of residence. Ini kun mapirmahan na ang Executive Order ni Gov. Defensor dugang pa ni Col. Gorero.

Ginpaathag niya man nga wala sang problema sa mga APOR kag mga may emergency ukon humanitarian reasons. Sa mga APOR suno sa iya, kinahanglan lang nila nga magpakita sang ID.

Kun may mga sintomas naman sang COVID-19 pareho sang hilanat, nga makit-an sa nagalabay sa border indi gid sila pagpasugtan nga makasulod.

Ginpahayag ni Col. Gorero nga nakatutok ang kapulisan sa mga borders sang probinsiya sa mga kaiping nga kaprobinsiyahanan, kag dumilian nila nga mkasulod ang mga luyag lang nga maglagaw. — via Aksyon Night Patrol

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply