ILOILO – May ginasundan na nga anggulo ang Miagao police sa kamatayon ni Pat. Marvin del Castillo nga nasapwan nga may pilas sang pagkatiro sa ulo sa Brgy. Damilisan, Miagao kahapon sang aga, Hulyo 20.

Suno kay PCPT Marvin Buenavista, hepe sang Miagao MPS, wala pa makahatag sang statement sa ila ang live-in patner ni del Castillo para sa dugang nga impormasyon sa ginahimo nga imbestigasyon.

Posible suno kay Buenavista nga naghikog ang pulis. Pero posible man nga may iban nga tawo nga nagsunod kay Del Castillo sa lugar sa diin siya nasapwan.

Ipaidalum sa paraffin test si Del Castillo agud mahibaluan kun nakapalupok siya sang pusil kag ipa-autopsy man ang iya nga bangkay agud matul-id gid ang natabo sa iya, suno pa kay Buenavista.

Si Del Castillo nga na-assign sa San Joaquin MPS, ang tumandok sang Brgy. Devera, Sara apang temporaryo nga nagatinir sa Purok 2, San Joaquin.

Sa panaysayon sang live-in partner, Hulyo 19 sang aga sang naglisensya si Del Castillo nga mapa-police station pero off-duty niya sang amo nga adlaw kag wala na nakapauli. –via Angel Mae Ciudad