Iloilo City — Ginhambalan ni National Police Commission 6 Dir. Atty. Joseph Celis si Cpl. Virgilio Rojo Jr. nga mag-resign na lang bangud indi man siya mapuslan sa serbisyo kag nagapahuya-huya lang sa PNP kag sa publiko.

Kasunod ini sa pagpatawag kay Rojo sang NAPOLCOM 6 may kaangtanan sa ila ginahimo nga imbestigasyon sa pagkadakop sa iya sa illegal nga pabulang sa Cagbang, Oton sang Hulyo 10.

Suno kay Atty. Celis, “ginhambalan ko siya gani nga resign ka na lang kay indi ka mapuslan sa serbisyo pahuya-huya ka lang sa PNP siling ko kag sa publiko sang opisyo mo nga bulang-bulang ka da nga daw haslo ka da.”

Ginpahayag ni Celis nga nagrason Rojo nga nagabakas lang siya para sa iya kabataan kabangdanan nga nag-intra siya sa bulang.

Pero ginsabat siya ni Celis nga, “indi mo ko di pag-usaran excuse mo nga bata mo kay ang gina-obra mo illegal. Indi na ‘ya husto. Kun gusto mo nga magtutom ka para sa kabataan mo, te sakripisyuhan mo eh. Indi amo na. Wala man sang magic nga pangabuhi nga malumpat ka lang.”

Naghatag sang negatibo nga impresyon sa PNP ang ginhimo ni Rojo suno pa kay Celis.

Ginhatagan sang NAPOLCOM 6 si Rojo sang lima ka adlaw, umpisa subong nga adlaw agud maka-file sang iya nga counter affidavit. — via Aksyon AM Reports

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply