‘Ihatag ta sa mga pigado gid’ — Mayor Jerry Treñas sa nabaton nga family food packs sang mga barangay halin sa DSWD

ILOILO CITY – Ihatag sa pinakapigado ang family food packs nga nabaton halin sa Department of Social Welfare and Development (DSWD) 6.

Ini ang suhestiyun ni Iloilo City Mayor Jerry Treñas sa mga barangay officials sa siyudad nga nagalibog ang ulo kun paano tungaon ang nabaton nga limitado nga food packs halin sa DSWD 6 sa ila mga residente.

Suno kay Treñas, “Bal-an ta man sa aton barangay kun sin-o gid ang mga pigado. Ihatag ta sa mga pigado gid nga nagakinahanglan.”

Sa pagkamatuod suno sa iya, nakita sang DSWD nga mabudlay ipanagtag ang family food packs gani ginaplano nila nga manghatag sang cash assistance sa mga naapektuhan nga pumuluyo samtang napaidalum ang siyudad kag probinsiya sang Iloilo kag iban pa nga lugar sa Enhanced Community Quarantine (ECQ).

Ginpahayag pa niya nga na-endorso na sa Office of the President ang rekomendasyon sang DSWD kag ginahulat pa kun maaprubahan. — via Aksyon Firingline