ILOILO — Patay ang driver sang motorsiklo sang nakabunggo sa nagapundo nga truck sa Barangay Cajaguicjican, Pototan, mga las-dos ymedya (2:30PM) subong nga hapon, Hulyo 23.

Ginkilala ni Police Staff Sergeant Raffy Gonzales, imbestigador sang Pototan Police Station ang napatay kay Harvie dela Cruz, 24, sang Dongsol, Pototan.

Base sa imbestigasyon sang Pototan police, nagpundo ang truck sa higad sang karsada bangud nagbakal sang tubig ang driver nga si Marlon Deo, 46, sang Mansaya, Lapuz kag nakibot lang siya sang gulpi nga may naglagapok sa likod sang truck. May patal nga pilas sa ulo si dela Cruz kag dead-on arrival sa ospital.

Halin sa Dongsol ang motorsiklo kag padulong sa banwa sang Pototan samtang halin naman sa Iloilo City ang truck kag padulong sa Passi City.

Sa pagpangusisa sang Pototan police sa pila ka residente sa Dongsol, naka-inum sang makahulubog nga ilimnon si dela Cruz. Posible suno sa iya nga napiyongan siya rason nga wala niya natalupangdan ang truck.

Gin-custody naman sang Pototan police si Deo.

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply