TOKYO, Japan – “Gatulo ang luha mo sa kalipay. Finally nakakuha kita sang ginahandum sang bilog nga mga Filipino nga atleta – ang gold medal.”

Ini suno kay Mr. Mariano “Nonoy” Araneta, Chef De Mission para sa Tokyo Olympics 2020 sang Philippine delegation, ang ila reaksyon sang nakuha ni Filipina weightlifter Hidilyn Diaz ang gold medal sa women’s 55 kilogram sa Weightlifting.

Gin-ako niya nga antes pa man ang hinampang, kumpyansa na sila nga makakuha sang medalya si Diaz sa Tokyo Olympics pero bangud sa determinasyon kag pangamuyo, nakuha niya gid ang bulawan nga medalya.

“Proud” gid suno kay Araneta, ang tanan nga atleta kag delegasyon sang Pilipinas sa Tokyo Olympics sa kadalag-an ni Diaz “The first time nga ginkanta ang Philippine national anthem ta sa Olympics.”

Bisan ano ang kakapoy nila sa Olympics, daw nakuha ini tanan kasunod sang gold medal nga naangkon sa una nga tiun sang pungsod.

‘MGA ATLETA NGA GINALAUMAN MAKAKUHA SANG MEDALYA’

May mga atleta pa nga ginalauman man nga makakuha sang medalya sa nagapadayon nga Tokyo Olympics ilabe na ang ma-compete sa boxing lakip ang Ilongga nga si Irish Magno, tumandok sang Janiuay, Iloilo.

Magluwas sa ila, ginalauman man nga makamedalya kanday Yuka Saso sa Golf, pole vaulter EJ Obiena, kag gymnast nga si Carlos Yulo nga ma-compete sa finals sang vault exercise.

“Indi mag-untat ang aton pangamuyo para sa success sang aton mga athletes kag most of all para sa health kag safety sang mga athletes” suno kay Araneta samtang nagapanghalit ang COVID-19.

Kasunod sang gold medal ni Diaz, “ in high spirit” ang iban pa nga atleta agud makakuha man sang medalya.

Duha ka adlaw matapos ang kompetisyon, dapat mapauli na ang atleta sa pungsod, dugang ni Araneta.

Nagpanugyan man si Araneta sa iban nga Filipino athletes nga nagahandom nga maka-compete sa Olympics nga, “Kinahanglan stay focused sa kun ano man ang gusto mo nga matabo sa pangabuhi mo parehos sa mga atleta. May ginahandom ka, di ba? so kinahanglan tan-awon mo kun paano ma-achieve ang handom mo. Indi man lang puro ka lang damguhanon nga waay ka man may gina-ubra.”

Si Mr. Araneta ang tumandok sang Barotac Nuevo, Iloilo. — via Aksyon Firingline

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply