20 pulis sa Alimodian, Iloilo, nagpositibo sa COVID-19
ALIMODIAN, ILOILO-Nagpositibo sa COVID-19 ang 20 ka mga police officers sa Alimodian, Iloilo.
Ini ang ginkumpirmar ni Vice Mayor Kenneth Alfeche.Suno sa iya, duha diri ang opisyal kag 18 ang personnel.
Ginpahayag ni Alfeche nga una nagpositibo sang Lunes, Hulyo 26 ang duha ka preso nga inug-remit sa Pototan District Jail gani gilayon naghimo sang contact tracing ang LGU.
Ginpabutyag niya nga may pila ka mga pulis ang nakabatyag sang sintomas.
Kaina lang sang aga, Hulyo 29 naggwa ang resulta sang RT-PCR test result sang mga pulis kag 20 ang nagpositibo sa COVID-19.
Natalana naman nga i-swab ang iban pa gid ka mga pulis, utility kag preso.
Ginklaro ni Vice Mayor Alfeche nga sirado subong ang police station kag temporaryo nga himuon ang operasyon sang police station sa ABC hall.
Ginpahayag ni Alfeche nga pito sa mga nagpositibo ang naka-quarantine sa police station; lima ang naka-quarantine sa boarding house sang estasyon; duha ang inug-turn over sa ila kabanwahanan samtang naka home quarantine ang iban pa gid.
May gindapadala naman nga pulis ang IPPO agud mag-augment sa Alimodian Police station.
Nagpanugyan naman si Vice Mayor Alfeche sa mga pumuluyo nga magkooperar, maghalong kag indi maglagaw kun wala man lang sang importante nga kadtuan. — via Aksyon Angel Mae Ciudad