Ginpahibalo ni Iloilo City Mayor Jerry Trenas nga naka-record sang labing una nga Delta variant sa COVID-19 sa siyudad sang Iloilo.

Sa post sa Facebook sang alkalde, iya ginkumpirmar nga ang Delta case, empleyado sang isa ka kompaniya sa Molo base man sa impormasyon sa iya sang City Epidemiology and Surveillance Unit (CESU).

Ang aktibo nga kaso naghalin sa Mandurriao nga na-test nga nagpositibo sa COVID-19 sang Hulyo 9 kag liwat nagpositibo sang ginsulit ang test sang Hulyo 23.

Ang 30-anyos nga empleyado naka-eksperiensiya sang mga sintomas pareho sang flu. Ginpadala ang iya samples sa Philippine Genome Center para sa sequencing matapos nakita nga mataas ang iya viral load.

Ang report nabaton sang CESU paagi sa email subong nga adlaw halin sa Department of Health Epidemiology Bureau.

Wala sang travel history ang amo nga empleyado kag wala man sang close contact sa iya workplace.

Wala pa nabakunahan ang amo nga empleyado.

Nagpositibo man sa COVID-19 ang iya asawa nga gin-swab sang Hulyo 12.

Naka-home quarantine na ang mag-asawa. Negatibo naman ang ila duha ka kabataan nga lunsay menor de edad.

“I ordered to place the residence and workplace under lockdown. Extensive contact tracing and RT-PCR testing for the patient’s co-workers will also be conducted,” suno pa sa alkalde.

“We just ask for everyone’s cooperation as we are doing everything we can to contain its possible spread, including aggressive contact tracing and intensified testing,” dugang pa ni Trenas. — Via Jerry Trenas, FB

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply