ILOILO – Pareho na nga naka-record sang Delta COVID-19 variant ang Iloilo City kag probinsiya sang Iloilo.

Ginkumpirmar ni Cabatuan Mayor Ronilo Caspe nga ginpahibalo siya sang Provincial Epidemiology and Surveillance Unit nga may local case sang Delta variant sa ila banwa.

Suno kay Caspe, Hunyo 27 sang gin-admit sa Western Visayas Medical Center (WVMC) ang 32-anyos nga babaye bangud nabudlayan magginhawa. Negatibo siya sa RT-PCR test sang gin-admit.

Samtang naka-admit, nagpositibo sa COVID-19 ang babaye pero sang gin-test antes nagguwa sang Hulyo 23, nagnegatibo na siya sa virus. Ginapatihan nga nalatnan siya sang virus sa ospital.

Sang Hulyo 26, liwat nga naglain ang pamatyag sang babaye kag ginbalik sa ospital sang Hulyo 27. Kaina sang kaagahon, Hulyo 29, napatay ang pasyente.

Wala sang travel history ang pasyente, dugang sang alkalde. Apat ang iya kaupod sa balay pero indi man mahambal nga close contact sila, suno kay Caspe, bangud negatibo man sa COVID-19 ang pasyente sang nagpauli.

Gin-quarantine ang mga kaupod sa balay kag ipaidalum sila sa RT-PCR test bwas, Hulyo 30.

Una na ginkumpirmar ni Iloilo City Mayor Jerry Trenas nga may Delta variant na sa siyudad. Na-infect suno sa iya ang lalaki nga naga-estar sa Mandurriao kag nagatrabaho sa kompaniya sa Molo. — via Aksyon Mario Gelongo

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply