Utang sang PhilHealth sa Metro Iloilo Hospital and Medical Center, naglab-ot sa masobra P63 million
ILOILO CITY — P63,221,757 ang claims sang Metro Iloilo Hosptal and Mecial Center nga wala pa mabayaran sang PhilHealth. Suno ini kay Dr. Dan Encarnacion, hospital director sang Metro Iloilo Hospital.
Halin pa ini sang pag-umpisa gid sang operation sang ospital sang 2018 tubtob sang Agosto 24 subong nga tuig.
Kalabanan diri suno kay Dr. Encarnacion ang iya sang mga COVID-19 patients.
Sa nasambit nga kantidad, 24% ukon kapin sa P15-million lang ang iya sang non-COVID patients samtang 76% gid ukon kapin sa P48-million ang iya sang COVID-19 patients nga wala pa mabayaran sang PhilHealth sa ospital.
Ginpabutyag ni Encarnacion nga apektado gid sila katama bangud nagaguwa lang nga nagaguwa ang kwarta sang ospital apang wala man sila ginabayadan.
Ginpaathag niya nga bag-o pa lang ang Metro Iloilo Hospital kag may may loans pa ini nga ginapangbayadan halin sa pagtukod sini.
Magluwas diri may hazard pay man sila nga ginahatag sa ila mga personnel.
Dugang niya, insaktuhan lang gid ang pondo sang ospital para sa pampasweldo nila sa ila mga empleyado kag ginabayad sa loan.
Ginpahayag ni Encarnacion nga isa sa ila ginakulbaan ang pag-abot sang tiyempo nga indi na nila masarangan magpasweldo sa ila mga tinawo. — via Aksyon Firingline