16-anyos nga dalagita, nagreklamo nga ginhimuslan sang 23-anyos nga lalaki sa Leon; Suspek, patay sang naghikug matapos nag-report sa pulis ang tagreklamo
ILOILO — Nagreklamo ang 16-anyos nga dalagita nga ginhimuslan siya sang 23-anyos nga lalaki sa Leon.
Sa panaysayon ni alyas Inday sa Leon police, natabo ang insidente sa isa ka barangay sa banwa mga las 6:30 kagab-i, Setyembre 5.
Ginhagad siya kahapon sang lalaki nga magkadto sa banwa sang Leon agud magbakal sang balut.
Bangud live-in partner sang iya himata ang suspek kag ila man kasilingan, nagsalig si Inday kag nag-upod sa lalaki.
Sang nagapapauli na, gindala sang lalaki ang dalagita sa maligwin nga lugar, gintayaan sang kutsilyo kag ginhimuslan suno kay Police Lt. Melchor Tolentino, hepe sang Leon Police Station.
Gilayon nga nagpanugid sa iya lola ang dalagita sa iya nga pagpauli kag nag-report sa pulis.
Nag-conduct sang follow-up operation ang Leon police apang wala gid nila makita ang suspetsado.
‘NAGHIKUG’
Kaina sang aga, nakabaton sang impormasyon si Lt. Tolentino nga may lalaki nga nasapwan nga nagabitay sa puno sang lumboy.
Sang ginkadtuan, nakumpirmar sang Leon police nga ang suspek ang nagabitay kag na-establisar nga naghikug ang lalaki.
Nagapati si Tolentino nga nakunsensya ang lalaki sa iya ginhimo sa dalagita.
Nagapati naman ang pamilya sang suspetsado nga wala sang foul play sa kamatayon sang lalaki.
Natalana nga ipaidalum sa medical examination ang menor-de-edad suno kay Lt. Tolentino. — via BBB