Pulis nga ginpahayag biktima sang shooting incident sa Jaro, napatay sa ospital

ILOILO CITY – Nagahingyo sang privacy ang pamilya sang pulis nga napatay bangud sang pilas sang pagkatiro sa Cuartero Highway, Jaro, kahapon sang aga Setyembre 5.

Suno kay Lt. Wence Alcober, deputy station commander sang Jaro Police, nagapadayon pa ang ila imbestigasyon sa matuod-tuod nga natabo.

Yara sa sulod sang kwarto sa iya apartment ang lalaki sang natabo ang insidente. Ginhingagaw pa siya dala sa ospital bangud sang pilas sa ulo apang wala gid natabangan.

Limitado lang ang mga impormasyon nga ginhatag sang police bangud sa hingyo sang pamilya.

Na-recover sang SOCO sa scene of incident ang isa ka deformed slug, isa ka empty shell kag 9mm caliber pistol.

Matandaan nga ginpahayag sang mga residente nga wala man sila sang nabatian nga lupok sang pusil sa lugar kag nakibot na lang sila sang gindala sa ospital ang pulis nga may pilas sang pagkatiro. — via Aksyon Dave Bucayan