34 ka indibidwal sa Western Visayas, nakabatyag sang serious advserse effect matapos nabakunahan sang COVID-19 vaccines — DOH 6

ILOILO CITY –Masobra na 1.4 million ang nabakunahan sang COVID-19 vaccine sa Western Visayas, as of September 8 nga data sang Department of Health 6. Sa amo nga numero, 1,988 ang nakabatyag sang minor adverse events following immunization (AEFI) halin sa nagkalain-lain nga probinsiya sa Rehiyon 6.

Samtang 34 ka indibidwal ang gin-classify nga may serious adverse events—tag-lima halin sa Antique kag Capiz; apat sa Iloilo province, isa sa Negros Occidental; tatlo sa Bacolod City; kag 16 sa Iloilo City.

Suno kay Dr. Bea Camille Natalaray, designated spokesperson sang DOH 6 “Ang pinaka-common nga mga adverse events amo na ang mga general symptoms or reactions like ang pain sa site sa kun diin sila nabakunahan, chills, or fever or fatigue usually – amo na ang pinaka-common gid nga ginareklamo or ang gina-report sa aton nga mga minor adverse events following immunization.”

Ginpahayag pa niya nga “Ma-classify siya nga serious adverse reaction kun naga-require siya [sang] hospitalization or nag-cause [sang] disability or nagpa-hospital gid sa aton nga mga nabakunahan. Grabe gid ang pag-allergy niya sa aton nga mga vaccines – amo na ang common.”“Usually ang hypersensitivity gid nga anaphylaxis gid nga daw nabudlayan gid siya or severe gid ang allergic reaction or nabudlayan magginhawa after sang pagbakuna sa iya” ang nabatyagan sang may serious adverse reaction.

Ginsumiter sang DOH 6 ang kaso sang 34 ka indibidwal sa Committee on Adverse Events Following Immunization sang DOH- Central Office agud matun-an kun may direkta gid man nga kaangtanan ang COVID-19 vaccines sa ginbatyag sang mga natungdan.

Suno kay Natalaray, may reporting kag monitoring ang mga Vaccine Operations Center kag Rural Health Unit sa mga nabakunahan sang COVID-19 vaccines agud mahibaluan kun may adverse events.

“We have to remind ang aton public – ang aton nga mga vaccines, may ara gid na siya ‘ya [nga] side effects like ang aton nga fever, chills, fatigue or pain on the injection site. But we have to remember that these side effects are would usually last – one to three days. Kun magsobra na ina ang imo nabatyagan, it’s time for you to report kag magpa-check-up gid sa aton nga mga Rural Health Unit or sa aton nga Vaccine Operation Centers naton para mahatagan kita sang appropriate management kag ma-report man ang aton nga nabatyagan after sang aton vaccination,” panugyan ni Natalaray.

Kada adlaw, suno sa iya, nagasumiter sang report ang mga Local Vaccine Operation Centers kun may yara sila nga minor kag serious adverse event matapos ang vaccination.

Gilayon nga imbestigaran sang vaccine expert panel ang medical kag vaccination record sang pasyente kun ano natabu sa iya matapos nga nabakunahan lakip na ang mga sintomas nga nabatyagan. — via Aksyon Firingline