DepEd Iloilo, nagalaum nga madugangan pa ang enrollees para sa SY 2021-2022 kasunod sang pag-extend sa deadline sang enrollment tubtob Setyembre 30
ILOILO CITY — Ginalauman sang Department of Education- Division of Iloilo nga madugangan pa ang numero sang mga enrollees sa probinsya para sa school year 2021-2022 kasunod sang pag-extend sa enrollment tubtob Setyembre 30.
Subong kuntani, Setyembre 13, ang deadline sang enrollment sa DepEd.
Masobra 5,000 ang naghingagaw kaina nga magpa-enroll bangud wala pa sila nakahibalo nga gin-extend ang enrollment.
Suno kay Mr. Leonil Salvilla, Public Information Officer sang DepEd Iloilo, sa iya nga pag-check sa ila online monitoring toll, nanotisyaran niya nga nagataas ang numero sang mga enrollees base sa pag-update sang mga eskwelahan.
As of 2:00 pm, naglab-ut na sa 83% ang number of enrollees subong nga school year ipaanggid sang nagligad nga school year.
Ginpahayag ni Mr. Salvilla nga kapin 410, 467 enrollees ang na-record as of 2pm sa 42 ka municipalities sa probinsya. 392, 859 diri ang enrolled sa public schools samtang 17, 588 ang enrolled sa private schools.
Ginpabutyag ni Mr. Salvilla nga may mga problema nga gin-report sa ila sa una nga adlaw sang klase kasubong sang pila ka mga eskwelahan nga wala pa nakaumpisa distribute sang modules, pila ka mga ginikanan nga wala nakahibalo nga subong na masugod ang klase, samtang ang iban wala nakahibalo nga kinahanglan pa nila I-confirm ang enrollment sang ila kabataan.
Ginpahayag ni Salvilla nga ang iban nga ginikanan nagadumdom nga kun matapos na sang mga estudyante ang ila mga requirements snag nagligad nga school year, automatic na sila nga enrolled para sa madason nga school year.
Pero, ginklaro ni Salvilla nga kinahanglan pa nila I-confirm ang enrollment sang ila kabataan bangud wala man nakahibalo ang iban nga eskwelahan kun mapadayon ang estudyante sa pag-eskwela ukon ma-transfer.
Wala naman sang problema ang mga eskwelahan sa printing sang modules bangud ginabuligan sila sang LGU kag sa temprano nga preparasyon sang mga teachers.