ILOILO — Wala naga-untat ang Assistance to Individuals in Crisis Situation (AICS) program sang Department of Social Welfare and Development (DSWD) nga nagahatag sang cash assistance sa mga beneficiaries.

Isa na diri ang Cash Assistance for other Support Services ukon ang ginatawag nga sectoral AICS nga ginahatag sa mga sector sang kada LGUs nga naapektuhan sang pandemya.

Paathag ini ni Mr. Joselito Estember, crisis intervention section head sang DSWD kasunod sang tag-P3,000 nga ayuda nga nabaton sang mga PWDs, mangunguma, kag manugpangisda sa Banate, Iloilo kahapon, Setyembre 14.

Suno kay Estember halin sa General Appropriations ang pondo nga ginagamit sa paghatag sang ayuda sa idalum sang nasambit nga programa kag ginahatag lang ini base man sa request sang kada LGU sa opisina ni Pres. Rodrigo Duterte.

Gina-assess kag gina-validate suno sa iya sang kada MSWDO kun sanday sin-o ang mga sektor nga kwalipikado nga makabaton sang ayuda.

Sang Setyembre 13, nag-payout ang DSWD sa Miagao, Guimbal, Tigbauan, kag Oton. Kaina naman ila ginpadulungan ang Leganes, Dumangas, kag Banate kag natalana pa nga pangkadtuan ang San Miguel, Pavia, Pototan, San Enrique, Passi City, kag Sta Barbara.

Ang nasambit nga mga LGUs pa lang suno kay Estember ang naka-request para sa sectoral AICS. — via Aksyon Firingline

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply