Bata sang alkalde sang Banate, Iloilo kag isa pa ka wala makilalal-an nga lalaki, ginreklamo nga nangbangga kag nag-carjack sang dumptruck sang Mining company
BANATE, ILOILO — Nagreklamo sa pulis ang driver nga ginbanggaan siya kag gin-carjack ang dump truck nga iya ginamaneho kag ginapanag-iyahan sang Panay Mineral Hub Sales Corporation (PMHSC) kahapon sa Brgy. Juanico.
Suno kay Police Staff Sergeant Joelito Babayo II, imbestigador sang Banate Municipal Police Station, halin sa quarry site sa Sitio Matingkong, sa nasambit nga barangay ang truck nga puno sang filling materials nga ginamaneho ni Raul Piñas sang ginbanggaan ni Peter Paul Cabangal, bata ni Banate Mayor Carlos Cabangal upod ang isa pa ka wala makilal-an nga lalaki.
Ginpahayag sang driver nga ginhambalan siya ni Peter Paul nga magpanaug bangud dal-on nila ang truck. Ini ang rason kun ngaa nagpanaug man ang driver kag ginhatag sa duha ang truck bangud sa kakulba.
Ginmaneho suno sa iya sang lalaki nga kaupod sang bata sang alkalde ang truck padulong sa direksyon sang banwa sang Banate samtang nagasunod ang SUV nga puti nga ginamaneho ni Peter Paul.
Las-10 sang aga sang nag-report si Piñas sa pulis may kaangtanan sa natabu.30 minutos ang nagligad sang may nagdul-ong nga wala makilal-an nga lalaki sang yabi sang truck sa police station kag natukiban nga yara na naka-park sa Galleria de Banate malapit sa highway.
Las 10:48 sang ginkadtuan sang pulis ang dump truck kag gindala sa estasyunan.
Ginpabutyag naman ni Norman Cabangal, permitee sang quarry site sa banwa nga posible ginapagguwa ni Peter Paul, nga iya hinablos, nga may utang siya sa ila.
Si Norman, tiyo ni Peter Paul, ang permitee sang quarry site samtang ang Panay Mineral Hub Sales Corporation (PMHSC) ang operator.
Ginpabutyag ni Norman nga “komisyon” ang utang nga ginatumod ni Peter Paul.
Suno kay Norman, may transaksyon kuntani si Peter Paul nga magbakal sa iya sang filling materials sa ginakay-o nga esplanade sa baybay sang Banate apang wala ini matigayon.
Dugang niya, bisan nga wala madayon ang ila nga transaksyon, nagapangayo gihapon sang komisyon sa iya si Peter Paul kag ini ang ginatumod niya nga utang.
Ginatinguhaan pa sang Aksyon Radyo Iloilo nga makuhaan sang pahayag si Peter Paul Cabangal. — via Aksyon Firingline