4 ka eskwelahan sa probinsya sang Iloilo, ginrekomendar nga mapasakop sa pilot implementation sang limited face-to-face classes

Read Time:1 Minute, 20 Second

ILOILO — Hiwatan sang limited face-to-face classes ang mga lugar nga manubo ang kaso kag wala nagadugang ang COVID-19 cases.

Sabat ini ni DepEd Iloilo Public Information Officer Leonil Salvilla matapos gin-aprubahan ni Presidente Rodrigo Duterte ang pilot implementation sang limited face-to-face classes sa mga low-risk areas sa pungsod.

Kinahanglan suno kay Salvilla ang assessment sang DOH kag LGU nga nagapamatuod nga manubo kag wala nagadugang ang kaso sang COVID-19 sa lugar.

Magluwas sa manubo nga kaso, dapat may pahanugot man sang mga ginikanan, barangay kag LGU ang paghiwat sang limited face-to-face classes.

12 lang ang tugutan sa isa ka classroom sang Kindergarten, 16 sa Grade 1 tubtub Grade 3 kag 16 sa senior high school.

Magalawig sang 3 ka oras ang klase sa Kindergarten kag Grade 3 kag apat naman ka oras sa vocational kag senior high school.Sundon sa gihapon ang minimum public health standard, suno kay Salvilla, sa limited face-to-face classes.

Wala pa sang nabaton nga guidelines ang DepEd Iloilo halin sa DepEd Central office nga butangan sang plastic barrier ang polungko-an sa eskwelahan sa pagsugod sini.

Ginrekomendar ang apat ka eskwelahan sa probinsya sang Iloilo nga hiwatan sang limited face-to-face classes.Ginalakipan ini sang Tomas Confesor Memorial Elementary School sa Cabatuan; Granada National High School Ballesteros Campus sa Carles; Palanguia National High School sa Pototan; kag Cabacanan Elementary School sa Alimodian.

Ginahulat na lang suno kay Salvilla ang approval sang DepEd Central office.100 ka pampubliko nga eskwelahan sa pungsod ang mapasakop sa pilot implementation. — via AM Reports