ILOILO – Wala gid nakapakita kay Cabatuan Mayor Ronilo Caspe ang opisyal sang Department of Education Division of Iloilo agud magplastar sang mga himuon matapos ila ginrekomendar nga mangin kabahin sang pilot testing sang limited face-to-face classes ang Tomas Confesor Elem. School sa Barangay Tabucan.

Ginbuyagyag ni Mayor Caspe nga ang principal lang sang eskwelahan ang nagpahibalo sa iya sang nagligad nga tuig pa nga nalakip sila sa pilot testing, kag wala na nakabalik subong nga tuig.

Ginpa-athag ni Caspe nga sang gin-inform siya sang 2020, manubo ukon wala gid sang kaso sang COVID-19 ang Barangay Tabucan. Pero, “ang Barangay Tabucan, sang middle part this year, nag-top sa number of positive cases sa Cabatuan.”

Dapat suno kay Caspe nga i-konsiderar ang COVID-19 cases antes dayunon ang plano.

Sa subong, just in case mag-push through gid man ina [ang limited face-to-face classes] kag m-improve ang sitwasyon [sa barangay sa diin na-locate ang eskwelahan], ako diri may ginapreparar nga pwede ko madugang sa proteksyon sang aton mga kabataan, pareho abi sang face mask, face shield, vitamins, alcohol kag iban pa nga bagay nga pwede ma-augment sa kabataan nga magpasakop sa face-to-face classes,” suno kay Caspe. –via Aksyon Hotline