LMP Iloilo Chapter President, San Enrique Mayor Trixie Fernandez sa DepEd: Dapat may discussion kita [sa pagpatuman sang face-to-face classes]
ILOILO – Importante nga madiskusyunan antes ipatuman ang limited face-to-face classes.
Sa opinion ni League of Municipalities of the Philippines Iloilo Chapter Presidente, San Enrique Mayor Trixie Fernandez, dapat pungkuan ini sang taga-Department of Education upod kay Governor Arthur Defensor Jr. kag mga mayors.
Indi man suno sa iya kinahanglan nga may physical meeting nga matabu. “They could also call for a Zoom meeting to consult the mayor(s) and get our opinion kag mga inputs namon what’s happening on the ground. Indi lang nga ma-base lang sila sa ila kun ano man ang ila judgment kag observation.”
Nag-react si Fernandez bangud sa iya pagkahibalo, wala sang konsultasyon nga ginhimo ang taga-DepEd subong nga tuig sa mga local government units may kaangtanan sa plano. Matuod suno sa alkalde nga nagkonsulta ang DepEd sa LGUs sang nagligad nga tuig, pero lain na ang sitwasyon subong bangud madamo sang variants sang COVID-19 nga nagalapta.
Nagapati si Fernandez nga pareho man sa iya ang sentimento sang kalabanan nga mayors sa probinsya nga nagapang-alang-alang pa sa pagpatuman sang face-to-face classes bisan nga limitado pa lang ang set-up.
Gin-ako sang alkalde nga wala pa siya naka-istorya sa iban nga mayors, pero posible magpakigsapol sila kay Gov. Defensor agud isa lang ang ila mangin position.
“As much as education is equally important, it is one of the foundations of our society, I believe that health and lives should be protected first before anything else,” ang pahayag pa ni Mayor Fernandez. –via Aksyon Hotline