ILOILO CITY – Napadala na sa Commission on Elections En Banc ang request ni Iloilo City Mayor Jerry Treñas nga i-extend ang voter registration bangud makapila ka beses ini nga nauntat sang ginpaidalum ang syudad sa ECQ kag MECQ.

Suno kay Mr. Jonathan Sayno, Election Assistant II sang City Comelec, ang Comelec En Banc ang nagahimo sang desisyon sa request kapareho sang hingyo ni Mayor Treñas.

“Ang akon paglantaw, indi na pwede nga selected lang nga mga lugar ang ma-extend… ang En Banc ang maga-decide kay kun inkaso may extension [sang voter registration], bilog nga Pilipinas na lang ang pasugtan nga may extension,” suno kay Sayno.

Madasig man lang magdesisyon ang En Banc suno kay Sayno.

Ginpanan-aw ni Sayno nga magalab-ut sa 320,000 ang maparehistro sa syudad tubtob sa Setyembre 30 nga amo ang katapusan nga adlaw sang registration kun indi gid man ma-extend. –via Aksyon Hotline