ILOILO CITY – Magabalik na sa normal rate ang balayran sa elektrisidad sang mga konsumedor sang MORE Power Iloilo.

Suno kay MORE Power President & CEO Roel Castro, maga-epekto ini subong nga adlaw, Setyembre 23.

Ginhimo ini sang MORE kasunod sang mandu sang Energy Regulatory Commission nga untaton ang additional charges may kaangtanan sa pagkaguba sang submarine cable sang National Grid Corp. of the Philippines nga naapektuhan sang dredging activity sang Department of Public Works and Highways.

“Babalik tayo doon sa normal rate natin which will be between mga P6.50-P7.00 per kWh… ang effectivity niyan is today,” suno kay Castro.

Sang July 2021 billing, nagnubo na ang rate sang MORE Power sa P6.55 per kWh pero nagsaka bangud sa line rental nga ginpatong sang Philippine Electricity Spot Market Corp. (PEMC) sa mga distribution utilities (DUs).

Madamo sang nagreklamo, lakip na ang MORE Power suno kay Castro, gani nagsulat sila sa ERC kag nangin positibo man ang sabat ni ERC Chairperson Agnes Devanadera.

Sa sulat nga ginpadala ni Devanadera kay PEMC President Leonido Pulido III, nakabutang nga indi dapat pag-ikarga sa mga konsumedor ang dugang nga sukot sa elektrisidad bangud wala man sila sang kahilabtanan sa pagkaguba sang submarine cable.

Ginapa-refund sang ERC ang additional charges nga una na nakolekta sang mga DUs sa mga konsumedor sang Hunyo tubtob Agosto 2021. –via Aksyon Hotline