ILOILO CITY – Ginpasalig ni MORE Power Iloilo President & CEO Roel Castro nga i-refund sa mga konsumedor ang ginsukot nga line rental fee may kaangtanan sa pagkaguba sang submarine cable sang NGCP nga naapektuhan sang dredging activity sang DPWH.

Ang pag-refund ang isa sa mga mandu ni ERC Chairperson Agnes Devanadera sa iya sulat kay Philippine Electricity Spot Market Corp. (PEMC) President Leonido Pulido III sang Setyembre 20, 2021.

Paathag ni Castro, ang line rental fee ang market mechanism nga ginapatong sa balayran sang mga konsumedor kun may line congestion ukon kun may power plant nga may outage. Pero gina-gamit lang ini sa short term nga sitwasyon kag indi sa malawig nga period.

Nakabutang sa sulat ni Devanadera nga posible sa 2023 pa mabalik ang normal operation sang submarine cable.

Ginpahayag ni Castro nga komporme siya nga indi dapat pag-ipasa sa mga konsumedor ang dugang nga charges bangud indi man sila ang may sala sa pagkaguba sang submarine cable.

“Yong refund, kasi the order [of ERC to stop additional charges] just came out yesterday [September 22], i-clarify lang muna namin sa regulatory body ‘yong aming plano on how to refund. Once that is cleared, we will effect the refund also. Rest assured, what has been collected for line rental, we will refund that. And starting today, ‘yong new billing for September, wala na ang line rental,” ang pahayag ni Castro.

Ma-epekto subong nga adlaw ang pag-untat sang MORE Power sang sukot sa line rental fee, suno kay Castro. –via Aksyon Hotline