Ordinansa sa paggamit sang face shield sa Iloilo City, posible indi na pag-amendaran kasunod sang verbal order ni Presidente Duterte nga indi na ini required sa pampubliko nga lugar
ILOILO CITY – Posible nga indi na pag-amendaran sang City Council ang ordinansa sang syudad may kaangtanan sa mandatory nga pagsuksok sang face shield/eye protector sa pampubliko nga mga lugar.
Ini ang pahayag ni Councilor Ely Estante, author sang Regulation Ordinance No. 2020-085, kasunod sang verbal order ni Presidente Rodrigo Duterte nga indi na required ang pagsuksok sang face shield sa mga pampubliko nga lugar, magluwas lang sa 3Cs —closed spaces, crowded places kag close-contact settings.
Sa paghangup ni Estante, kun makapagguwa ang presidente sang executive order, temporaryo man lang ini kag “maskin ano oras kun makita nga dapat i-lift, i-lift ina.”
Ginpahayag sang konsehal nga nakahibalo naman ang mga pumuluyo kun ano ang buot silingon sang closed space, crowded place kag lugar nga may closed-contact setting.
Pero kun mag-isyu ang presidente sang EO, dapat maathag ang kahulugan sang 3Cs agud wala sang pagsalangisag. –via Aksyon Hotline