ILOILO CITY – Nagsugod subong nga adlaw, Setyembre 24, ang temporaryo nga pagsirado sang portion sang Circumferential Road 1 sa Buhang, Jaro bangud sa ginapa-obra nga flyover. Magalawig ang closure tubtob Setyembre 26..

Suno kay Engr. Jonah Paloma sang Construction Section sang Department of Public Works and Highways Iloilo City District Engineering Office, halin las-siete sa aga tubtob las-singko sa hapon ang road closure. Iga-install ang walo ka girders rason sang temporaryo nga pagsirado sang karsada.

Ginapanugyanan ang mga motorista halin sa Pavia area nga mapakadto sa Coastal Road kag vice versa nga maglabay sa Radial Road, Sta. Barbara-Leganes Road kag Leganes Road. Pwede man nga mag-agi sa Tacas, Jaro kag Quintin Salas Road.

Wala naman sang traffic rerouting halin Leganes pakadto sa Jaro kag vice-versa.

Nagahingyo si Engr. Paloma sa publiko sang gamay nga konsiderasyon sa temporaryo nga road closure agud gilayon nga mahuman ang flyover kag masolusyonan ang trapiko sa Buhang, Jaro. – via El John Mejia