2 patay, 1 pilason sang ginpaarakan tiro ang mga nakasakay sa van sa Passi City
PASSI CITY – Duha patay kag isa pilason sang ginpaarakan tiro ang ginasakyan nga van sa Barangay Aglalana, Passi City kaina sang hapon, Setyembre 25.
Suno kay Jinnefer Opina, driver sang van, apat sila nga sakay sa salakyan sang nagluntad ang pagpaniro kag maswerte nga wala siya napilasan.
Ginkilala sang Passi City Police ang napatay kay Jennylyn Griño sang Tanza Esperanza, City Proper kag certain Jomar Fuentes nga pareho nga dead-on-arrival sa ospital.
Samtang pilason naman si Kenneth Dorado nga residente sang Panit-an, Capiz.
Kaina sang aga, ginpahayag ni Opina nga gin-contact siya ni Kenneth kag gin-pick-up niya ang tatlo sa Tanza Esperanza agud magpadul-ong kuntani sa Panit-an, Capiz.
Base sa panaysayon ni Opina, ang vios nga salakyan nga nagasunod sa ila ang nagpaarak sang tiro.
Sang yara sa kurbadahon nga portion sang karsada, naghatag sang ligwa si Opina agud maka-overtake ang Vios pero nakibot lang siya sang ginpaarakan sila sang tiro sang nagtupong ang salakyan sa ila ginasakyan. 13 ka lupok ang nabatian ni Opina.
Sang nagkalma ang sitwasyon, nagtiner pa siya sa sulod sang salakyan antes nagguwa kag nagpangayu sang bulig sa palibot.
Antes sini, ginpahayag pa ni Opina nga naka-overtake pa siya sa vios sang yara pa lang sila sa Dawis, Pototan pero naghapit sila malapit sa bulangan sa Passi City agud magpanyaga.
Sang naglakat na ang van, nag-abtanay sila liwat sang Vios sa nasambit nga lugar tubtob nagluntad ang krimen.
Sang nabatian ni Opina ang lupok gilayon siya nga nagkuob sa manibela rason nga wala siya maigu.
Nagderitso suno sa iya sa direksyon sang Roxas City ang Vios pero sa impormasyon nga nakuha sang Aksyon Radyo News team, nagbalik ini sa sentro sang Passi City.
“RECOVERIES”
Na-recover sa ginluntaran sang krimen ang basiyo sang 9mm, M16, kag Cal. 45, suno kay PLTCOL Dennis Pamonag, hepe sang Passi City Police Station.
Kapin 20 ka basiyo ang nakit-an sang kapulisan sa lugar.
Sa pag-usisa sang SOCO sa sulod sang van, na-recover ang apat ka mga bag —isa ka backpack, isa ka hand carry, belt bag, kag eco bag nga lunsay may unod nga mga personal belongings.
Wala sang mga kontrabando nga na-recover sa mga dala sang mga pasahero sang van dugang pa ni Pamonag.
“BACKGROUND SANG MGA BIKTIMA”
Si Dorado nga napilasan sa insidente ang nakaagi dakpan sa drug buy bust operation sa Roxas City sang 2008.
Ini ang ginkumpirmar ni Police Lieutenant Mary Cris Dela Cruz, hepe sang Panit-an Police Station sa Capiz.
Magluwas diri, ginpasakaan man sang kaso nga frustrated murder si Dorado sang 2017 sa Panit-an kag sang 2018, nakaguwa sa presuhan.
Si Dorado ang tumandok sang Barangay Bahit, Panit-an, Capiz.
Samtang si Griño naman nga napatay, tumandok sang Tanza Esperanza, City Proper, suno kay Punong Barangay Wilbur Orada.
Ginkumpirmar man sang kapitan nga nakaagi dakpan sa drug buy bust operation si Griño, 10 tubtob 12 ka tuig na ang nakaligad sa ila barangay kag duha tubtob tatlo ka bulan pa lang ang nakaligad sang nakaguwa sa presuhan.
Ginbuyagyag ni Orada nga nakita niya sa ila barangay kagab-i, Setyembre 24 ang van nga ginpaarakan tiro sa Passi City.
Sa pagkahibalo niya, kaina lang sang udto naghalin sa ila barangay ang van.
Sa initial nga impormasyon, mag-live-in partner sanday Dorado kag Griño.
Magluwas kay Griño, napatay man ang isa ka lalaki nga gin-identify kay Jomar Fuentes (gina-validate pa ang matuod nga pangalan).
Sa impormasyon ni Orada, sa ila na barangay na kuntani matiner si Griño upod sa iya bag-o nga live-in partner rason nga nagpanghakot sila sang gamit halin sa Capiz.
Ginapadalman naman sang Passi City Police ang responsable sa krimen. Gina-imbestigaran man kun ano ang motibo sang krimen. – via Aksyon Angel Mae Ciudad, Aksyon Reports Afternoon Edition, Firingline