2 ka myembro sang Philippine Army, pilason sa engkwentro batok sa mga NPA sa Tapaz, Capiz
Pilason ang duha ka myembro sang 12th Infantry Battalion sang Philippine Army sa engkwentro batok sa mga ginapatihan miyembro sang New People’s Army sa Brgy. Sia, Tapaz, Capiz mga las-6 kaina sang aga.
Suno kay 3rd Infantry Division Spokesperson Captain Kim Apitong, nakabaton sila sang madamo nga impormasyon nga may presensya sang CPP-NPA sa lugar rason nga ila ginpadulungan.
Ginpahayag ni Apitong nga nag-abtanay gid ang militar kag ginabanta 10 ka NPA members sa lugar kag natabo ang engkwentro.
Napilasan ang duha ka suldado sa butkon kag tiil, suno kay Apitong, kag estable naman subong ang ila kondisyon.
Samtang, posible nga may napilasan ukon napatay sa mga NPA bangud madamo sang tinulo sang dugo sa lugar, suno kay Apitong. Na-recover sa encounter site ang isa ka rifle grenade, radyo, 10 ka cellphones, hard disk, kag mga gamit nga ginapatihan ginkuha sa mga pumuluyo.