Guimbal Mayor Oscar Garin, napatay sa ospital
ILOILO – Napatay sa edad nga 80 si Guimbal Mayor Oscar “Oca” Garin.
Ginkumpirmar ini sang iya mga bata nga sanday Vice Gov. Christine Garin kag Guimbal Vice Mayor Jennifer Garin Colada.
Sa Facebook post ni Vice Gov. Garin, iya ginsulat nga, “We lost a great man. Love you so much Tatay. Always & Forever! You’re legacy will live on.”
Sa post naman ni Vice Mayor Colada, iya nasulat nga, “Wara na ko Tatay …Sakit sakit!!!!”
Sa isa pa ka post, ginbutang ni Vice Mayor Colada nga, “I will miss you Tatay. I will continue your legacy. Thank you for all the lessons you taught me. As what you have said before, accept your fate and move on. Man proposes, God disposes. I love you so much. There’s no pain greater than losing a father…”
Setyembre 17 sang gin-post ni Vice Mayor Colada sa Facebook nga na-ospital ang iya amay. Ginkumpirmar naman ni Vice Gov. Garin nga nagpositibo sa COVID-19 ang ila amay.
Si Mayor Oscar Gemarino Garin ang natawo sang Enero 22, 1941 sa Guimbal.
Nag-eskwela siya sang elementarya sa Guimbal Central School; sa University of San Agustin sa Iloilo City nag-high school kag sa amo man nga unibersidad nag-kolehiyo sa kurso nga Engineering.
Naka-agi siya nga congressman sa first district sang Iloilo kag pila ka beses naman nga nangin mayor sa Guimbal.
Si Mayor Garin ang bana ni San Joaquin Mayor Ninfa Serag Garin kag amay nanday former Cong. Richard Garin; AAMBIS-OWA Partylist Congresswoman Sharon Garin; Vice Governor Christine Garin kag Guimbal Vice Mayor Jennifer Garin Colada.