‘Kun sa hacienda pa, haciendero ni kontra sakada’ –Mr. Jun Capulot kun madayon ang pag-file niya sang COC sa pagka-mayor sa Iloilo City bunggo kay Mayor Jerry Treñas
ILOILO CITY – Gin-ako sang broadcaster nga si Mr. Jun Capulot nga dako nga kontra sa pulitika si incumbent Mayor Jerry Treñas.
Pahayag ini ni Capulot matapos ginkumpirmar nga sigurado na siya nga magpadalagan sa 2022 elections pero gina-finalize na lang kun mayor ukon konsehal ang iya padalaganan.
Gin-athag ni Capulot nga preparado siya nga magpadalagan nga mayor, pero may mga abyan man siya nga nagalaygay nga mas maayo nga ma-file siya sang certificate of candidacy sa pagka-konsehal.
Kun mapadalagan siya nga mayor, nagpasalig man suno kay Capulot sanday former councilors Plaridel Nava kag Joshua Alim sang suporta bangud kaupod sila sa grupo.
“Kun ako ang mapilian nga himuon [sang grupo] nga mayor, sakripisyo ni sa akon. Kay halimbawa sini, kun sa hacienda pa, haciendero ni kontra sakada,” suno kay Capulot.
Ma-file sang COC ang grupo nanday Capulot buwas sa hapon, Oktubre 8. –via Aksyon Hotline