Former Councilor Plaridel Nava, nag-athag nga wala nila gintulod si broadcaster Jun Capulot nga magpadalagan nga mayor sa Iloilo City

ILOILO CITY – Gin-athag ni former Councilor Plaridel Nava nga indi sila ni former Councilor Joshua Alim ang nagtulod kay Mr. Jun Capulot nga magpadalagan nga mayor sa syudad sa 2022 elections.

Pahayag ini ni Nava kasunod sang interview sang Aksyon Radyo Iloilo kay Capulot sa diin ginpabutyag sang broadcaster nga gusto sang iya mga kaupod sa grupo nga magpadalagan siya nga mayor bunggo kay incumbent Mayor Jerry Treñas.

“Ang matuod, wala gid man kami [ni former Councilor Joshua Alim] nagtulod [kay Jun Capulot nga magpadalagan mayor sa Iloilo City],” suno kay Nava.

Antes ang interview kay Capulot suno kay Nava, nahuman na ang istorya sa Duterte group nga mapadalagan ang broadcaster nga alkalde.

Pero antes pa sini, ginpabutyag man ni Capulot suno kay Nava nga konsehal ang iya padalaganan kag komporme man ang anay konsehal nga “Mas winnable na si Jun kun mag-konsehal siya.”

Ma-file karon sa hapon sang certificate of candidacy sa pagka-councilor si Capulot, upod kay Atty. Sheila Olid nga magarepresentar kay former Councilor Alim, kag kay Kayser Jadulos nga posible naman nga buslan ni Nava antes ang Nobyembre 15, 2021. –via Aksyon Hotline