ILOILO CITY – Nagapati ang tanod sa South San Jose, Molo nga may tuyo gid nga malain ang tricycle driver nga ginreklamo nga nagguyod sang call center agent pasulod sa kakugnan sa Megaworld sa Mandurriao kagab-i, Oktubre 8.

Suno kay alyas Toto nga nagbulig sa pamilya sang tagreklamo, nanugid ang call center agent nga nagsakay siya sa tricycle kag nagpadul-ong sa iya gina-obrahan sa Megaworld sang natabu ang insidente.

Samtang pasulod sa Megaworld, nagdulog suno sa tagreklamo ang driver nga si alyas JP, 23-anyos, sa kakugnan kag naglisensya nga mangihi. Pero sang nagbalik sa tricycle, ginpahayag nga gintayaan niya sang kutsilyo ang call center agent.

Sa nabatian ni Toto sa panaysayon sang tagreklamo, namangkot ang babaye kun tuyo niya ang kwarta ukon cellphone bangud ihatag niya man. Apang ginguyod siya sang driver pasulod sa kakugnan gani nga nagbato siya.

Natabuan naman nga may naga-roving nga security guard nga amo ang nagbulig sa babaye. Nagpalagyo pasulod sa kakugnan ang driver, apang nadakpan man sang ulihi bangud ginpalibutan sang iban nga gwardya kag mga tricycle drivers nga may ruta sa Megaworld ang area. Natabuan man nga naglabay ang patrol car sang police.

Nahibaluan naman nga ginhulam lang ni alyas JP ang tricycle.

“Ang balibad niya sa tag-iya sang tricycle nga hulamon niya [ang tricycle] kay idul-ong niya asawa niya… sa akon lang, paghulam niya sang tricycle, may tuyo na siya siguro nga bisan sin-o lang masakay sa tricycle amo na himuon niya,” suno kay Toto.

Suno naman kay alyas Inday, live-in partner ni JP, wala niya na-istorya ini na-istorya kun ano gid ang natabu sang nagkadto siya sa Mandurriao Police Station kagab-i.

Pero ginlaygayan ni Inday si JP nga mapakitluoy na lang. May siyam ka bulan nga bata ang mag-live-in partner.

Ginkumpirmar naman sang iloy ni JP nga may record nga pagpangawat ang iya bata sang una. –via Aksyon Hotline