ILOILO – Nagapati si Iloilo Police Provincial Office (IPPO) Director PCOL Gilbert Gorero nga matuod ang impormasyon nga napatay si Regional Most Wanted Drug Personality Ernesto “Erning” Bolivar, tumandok sang Brgy. Guinacas, Pototan.

Ini bisan pa nga nanginwala ang pamilya, suno kay Gorero.

Ginpahayag ni Gorero nga base sa impormasyon, napatay sa pneumonia si Bolivar.  

“Gapati kita nga nadula na gid man siya base sa information nga nakuha naton. Ang kulang na gid lang is the death certificate,” suno kay PCOL Gorero.

BACKGROUND

Si Bolivar ang Number 1 Most Wanted Drug Personality sa Western Visayas, suno kay anay PRO 6 Director Rene Pamuspusan sang 2019. Sang amo man nga tuig, nagtanyag si sadto IPPO Director Roland Vilela sang P100,000 nga reward para madakpan si Bolivar.

Nangin target sang Police Regional Office 6 si Bolivar kasunod sang kamatayon ni PNP-identified drug lord Richard Prevendido sang Setyembre 2017.

Si Bolivar ang ginapatihan nga tinawo ni Prevendido nga amo ang nagpadayon sang illegal drug activities sang napatay sa shootout sa mga pulis si Prevendido.

2016 sang nakapalagyo si Bolivar sa entrapment operation sang mga pulis sa iya nga balay. May pending warrant of arrest man siya sa kaso nga paglapas sa Comprehensive Dangerous Drugs Act of 2002. –via Aksyon Hotline