‘Kun ang Iloilo province tagaan lang tani more [COVID-19] vaccines, we are very ready to administer them’ –AAMBIS-OWA Partylist Rep. Sharon Garin
ILOILO – Nagakinahanglan ang probinsya sang Iloilo sang dugang nga COVID-19 vaccines.
Reaksyon ini ni AAMBIS-OWA Partylist Rep. Sharon Garin, chairman sang House Committee on Economic Affairs, sa statement ni testing czar Vince Dizon nga naga-commend sa daily COVID-19 vaccination rollout sang Iloilo City nga nagalab-ut kun kaisa sa 10,000 individuals kag pagbulig sang syudad sa vaccination efforts sang iban nga LGUs.
Suno kay Garin, nanotisyahan niya sa hearing sang iya komitiba sang nagligad nga bulan nga mas dyutay nga COVID-19 vaccines ang naga-abot sa Iloilo province.
“I noticed, Iloilo province at that time, mga early September ni siya bala, siguro butang mo na lang na siya sa mga 20% ang Iloilo Province. But Iloilo City was way higher… they’re hitting now siguro mga 60%, I’m not sure. It’s because more vaccines were given to them,” suno kay Cong. Garin.
Nagapati si Garin nga kun mahatagan lang sang dugang nga mga bakuna ang probinsya, makasarang man ini sa pag-administer sa mas dako nga populasyon.
Gin-athag sang kongresista nga wala siya nahisa, “nareklamo ko lang gid ‘ya ngaa ang Iloilo province dyutay ang nahatag. Kay duha man ka milyon [ang populasyon], times four of the population of Iloilo City. We need more vaccines.”
Ginkumpirmar ni Iloilo Gov. Arthur Defensor Jr. nga nagpasalig na ang national government nga mapadala sang dugang nga mga bakuna subong nga bulan. Suno sa gobernador, may 115,000 doses sang Sinovac vaccine kag 196,900 doses sang Pfizer vaccine nga ginapaabot subong nga Oktubre.
Sa data sang Provincial Health Office as of October 15, 2021, 30% sang target population ang natublukan na sang first dose sang COVID-19 vaccine sa bug-os nga probinsya samtang yara pa lang sa 22% ang nakakumpleto na sang ila bakuna. Sa Iloilo City, 53% na sang target population ang nakatapos sang ila bakuna, sa latest data sang City Health Office. –via Aksyon Hotline