‘When we checked the data, daw halos waay na sang ginapasugtan nga LGU nga magbakal [sang COVID-19 vaccines] –AAMBIS-OWA Partylist Rep. Sharon Garin

ILOILO – Ginakwestyun ni AAMBIS-OWA Partylist Rep. Sharon Garin kun ngaa wala na ginapasugtan ang mga local government units nga magbakal sang COVID-19 vaccines.

Suno kay Garin, sa gin-conduct nga hearing sang nagligad nga bulan sang House Committee on Economic Affairs nga iya ginapamunuan, ila nakita nga halos wala na sang LGUs nga gina-aprubahan nga magbakal sang mga bakuna.

Ginpa-athag niya nga ginapahanugutan sa vaccination law sang pungsod ang pagbakal sang LGU kag private business sang bakuna, “as long as pirmahan sang LGU, sang supplier kag sang national government. Tripartite agreement na siya. It’s in the vaccination law.”

“Kun gusto ‘ya sang probinsya magbakal, dapat pwede na magbakal,” suno sa kongresista.

Kun indi pagpasugtan sang national government ang provincial government nga magbakal, dapat kuntani nga sige-sige kag madamo nga bakuna ang ginapadala sa probinsya, suno kay Garin, bangud madamo naman nga vaccines ang nag-abot.

“1.4 million vacccines, we need. We need it from the national government. Kun indi sila mag-allow sa aton magbakal sang aton nga vaccines, ‘tagai na kami.’ Pila na kuno ka hundred million nag-abot nga vaccines sa Pilipinas, ti diin na to?. Daw kabudlay bala intiendihon,” ang pahayag pa ni Cong. Garin.

Una na ginkumpirmar ni Iloilo Gov. Arthur Defensor Jr. nga naghambal ang national government nga indi na magbakal sang mga bakuna bangud sila ang mahatag sa mga LGUs sa bug-os nga pungsod. Isa ini sa mga rason ngaa 270,000 doses lang sang AstraZeneca vaccines ang gin-order sang provincial government sang nagasugod pa lang ang pag-abot sang mga bakuna. –via Aksyon Hotline