Councilor Ed Peñaredondo, ginreklamo sang trisikad driver nga nanghangkat sang inaway, sang iya ginsaway nga indi mag-park sa driveway
ILOILO CITY – Ginreklamo sang trisikad driver si Iloilo City Councilor Ed Peñaredondo nga nanghangkat sang inaway sang iya ginsaway nga indi mag-park sa drive way kahapon, Oktubre 21.
Suno sa tagreklamo nga si Ever Hinojales, ginsugo siya ni Msgr. Meliton Oso, director sang Jaro Archdiocesan Social Action Center nga bantayan ang gate sang compound sang Jaro Cathedral malapit sa Development Bank of the Philippines sa tupad man sang simbahan.
Nag-park suno sa iya pasado las-11 kahapon sang aga si Councilor Peñaredondo sa atubang sang gate gani ginsaway niya bangud may nakabutang nga “Don’t Block the Drive Way”.
Apang nagsabat suno sa iya si Peñaredondo nga “’indi ako na kabalo magbasa.’”
Pagkatapos sini, ginpahayag ni Hinojales nga nagsulod sa bangko si Peñaredondo. Pagguwa sang konsehal, ginhangkat siya suno sa iya sang inaway.
Ginhambalan siya nga “’maano ka? Tulok mo? Maano ka? Maisog ka?’”
Gin-athag naman ni Hinojales nga wala sila naglab-utanay ni Peñaredondo.
Ginsaway man sila suno sa iya sang guwardiya sang bangko. Ginpahayag niya nga indi man siya magbato kag naglikaw siya bangud konsehal sang siyudad si Peñaredondo.
Nagpa-blotter sa Jaro Police Station si Hinojales pagkatapos sang insidente. Ginatinguhaan pa sang Aksyon Radyo nga makuhaan sang pahayag si Councilor Peñaredondo. — via Aksyon Night Patrol