‘May edad na ta…waay ta ya naga-amo amo na’ — City Councilor Ed Peñaredondo sa akusasyon sang trisikad driver nga ginhangkat niya sang inaway kag ginsakit ang tagreklamo

ILOILO CITY — Ginkadlawan lang ni Councilor Eduardo Peñaredondo ang akusasyon sa iya sang trisikad driver nga si Ever Hinojales, 51 anyos, nga nanghangkat siya sang inaway kag ginsakit ang tagreklamo sang ginsaway siya nga indi mag-park sang salakyan sa driveway.

Suno sa konsehal, wala siya naga-intra sa mga magamay nga bagay bangud tigulang na siya.

Sa siyam ka tuig niya nga pagserbisyo bilang konsehal sang siyudad, wala siya nakaagi ginreklamo kag na-involve sa gamo.

“May edad na ta. Mga pitsi-pitsi waay ta ya ga-amo amo na a. Waay ko ya agi gin-police blotter. Waay ko ya kaagi ginreklamo ko ya. Kadugay man ko ya imbestigador sang police wala ko ya ga-amo na. Head ko sang Parole and Probation Office sang Department of Justice. Ka-siyam na ko (ka tuig) magdaug konsehal, ma-pitsi pitsi nga daw bakya ko akon nga daw taga-kanto, indi na ya pwede sa akon a.” ang pahayag sang konsehal.

Ginkontra man niya ang claim sang trisikad driver nga gintuyo niya sakiton ang tagreklamo rason nga nabagrasan.

“Ano nga bagras? Waay kami ka hamrasanay a. De*****, ano ko ya agi? …ngaa sipaon, ngaa sumbagon. Hinambalan ko lang nga ‘tinapungol ta karon.’ Waay ko akon ya a. Siya aggressor. Siya ang ma-attack sa akon.”

Una na ginpahayag ni Hinojales nga ginsugo siya ni Monsignor Meliton Oso nga bantayan ang gate sang compound sang Jaro Cathedral malapit sa bangko nga tupad man sang simbahan kahapon.

Apang nag-park suno sa iya ang konsehal sa atubang sang gate gani iya ginsaway apang ginsabat lang siya sang konsehal tubtob nga ginhangkat siya sang inaway. — via BBB