Padayon kita nga magakooperar sa IATF’ – Jaro Archdiocese’s Social Communications Director Father Angelo Colada sa IATF protocols sa ‘Fiesta Minatay’

ILOILO CITY – Nahangpan sang simbahan Katoliko ang ginpagguwa nga protocols sang Inter-Agency Task Force para sa ‘Fiesta Minatay.’

Pahayag ini ni Father Angelo Colada, director sang social communications sang Jaro Archdiocese, sa mandu sang IATF nga siraduhon ang mga patyo, memorial parks kag columbaria sa Oktubre 29 tubtob Nobyembre 2 agud malikawan ang pagdugok sang mga tawo.

“Ang virus wala pa madula, ara pa sa gihapon. Tanan kita, prone nga malatnan sang COVID-19,” suno kay Colada.

Posible nakita sang IATF nga mabudlay pa ang sitwasyon, suno Father Colada. “Sa simbahan ‘ya, padayon kita nga magakooperar [sa IATF].”

Ginpabutyag pa ni Colada nga mabudlay ang sitwasyon ilabe na sa mga public cemeteries bangud mabudlay ma-control ang flow sang mga tawo. “Prone gid sa latnanay ang scenario.”

Gin-athag ni Colada nga indi naman mag-untat ang mga aktibidad sang simbahan may kaangtanan sa ‘Fiesta Minatay.’

“Ang church may ginahatag nga alternative. Indi pwede nga wala lang,” suno kay Colada.

Ginhalimbawa ni Colada ang pagsindi sang kandila bisan sa balay lang kag magpangayo sang pangamuyo sa mga parokya. Pwede man makakadto sa simbahan para mapamisahan ang minatay, pero sundon sa simbahan ang 50% capacity. –via Aksyon Hotline