Insidente sang pag-siphon sang gasolina kag pagkawat sang accessories sa pila ka naka-park nga salakyan sa Iloilo City, ginabanta na sa walo tubtob siyam suno sa ICPO director
ILOILO CITY –Ginapatutukan ni Iloilo City Police Office Director PCOL Uldarico Garbanzos ang reports sang pagpang-siphon sang gasolina sa naka-park nga pila ka salakyan sa nagkalain-lain nga distrito sa syudad.
Suno kay Garbanzos, lima ang nagpa-record sa mga police stations sa Jaro kag Mandurriao, pinakaulihi ang doktor sa Western Visayas Medical Center. Pero kun ilakip ang mga wala nakapa-record sa police, ginabanta ni Garbanzos sa walo tubtob siyam na ang ila nabaton nga kapareho nga insidente.
Kalabanan sa mga nabiktima ang medical practitioners, suno kay PCOL Garbanzons, kag pick-up ukon SUV ang ila salakyan.
Nakasugilanon na si Garbanzos sa mga establisemento, ilabe na sa Boardwalk, Smallville kag Atria areas agud mapabaskog pa ang seguridad. Nag-deploy man ang ICPO sang mga pulis.
“With the latest incident, there is already an intent to gain. Ginapalakat ko na ang aton traffic enforcement unit to trace up records…,” suno pa kay Garbanzos.
Ginakumbinser naman ni Garbanzos ang mga nabiktima nga magpa-blotter sa police stations.
“We encourage nga magpa-record so that later on, when there is apprehension, pwede naton ma-call kun magpasaka sang kaso,” ang pahayag ni Garbanzos. –via Aksyon Hotline